Ikusi, gozatu eta txalotu

Gutxitan daukagu Euskal Herrian musika bideoak ikusteko aukera, horregatik benetan eskertzen da zaletuei horrelako aukerak eskaintzea, are gehiago kalitate osoz egindakoa denean. Iaz Su Ta Gar taldeak E.H. Sukarra taldearekin batera Europan zehar bira bat eman zuen, bukaera nola ez Eibarren izan zen; talde bien sorterria.

Zuzeneko emanaldi honetan, taldearen betiko indarrari irudi egokiak gehitu dizkiote, jada entzuleen artean ohizko bilakatu diren zuzeneko kantaldi atseginak. "Ekaitza eta barealdia"-k irekitzen du, eta muntaiaren haunditasuna nabari da, sekulakoa, eskenatokia, argiak, jendetza izugarria. Eta abestiz abesti giroa berotuz, tarteka bideo heavyetan bezala taldeko partaideak hizketan agertzen dira, harrigarria, bira, taldea, sentimenduak, ikuslegoa, dena dute mintzagai. Zaletu gazteak entzun nahi duen hori, beti ere euskaraz.

Abestiak batez ere Hortzak estuturik beraien bigarren lanekoak dira, orduan kaleratu berri zutena, eta tartekatzen dituzte aurreragoko zenbait kantu ere, Jaiotze basatia diskokoak alegia. Zuzenean ikusita duen orok, badaki zer den hori; indarra, abiadura, amorrua, hasieratik bukaera arte, etengabeko martxa, taldea ez ezik, areto, gaztetxe, frontoi edota plaza osoa bateginik, parte hartzen, gozatzen. Horretarako aukerarik izan ez duenak, Euskal Herriko talde esanguratsuenetarikoa ezagutzeko parada ezin hobea du, ikusgarria. 

Aipatu bezala, Euskal Herrian etorkizun ilunegia du tamalez musika bideogintzak, nahiz eta musikagile, bideogile, zinema zuzendari ezin hobeak izan. Inguru honetan ez dago berauek helarazteko aukerarik, telebistak ere aukera hori ukatu digu ikusentzuleoi, kostuak benetan haundiak dira. Txalogarria beraz Su Ta Gar taldekoek erakutsitako kemena, beraiek, lagunen laguntza eskergarriarekin batera egin baitute lan osoa, banaketa, den dena. Ia besteak ere horrelako ikuskizunik eskaintzen diguten.