Diska baten hitzak komentatzea ohizko gauza ez bada ere, Ruper Ordorikaren diskak halako poetikotasun batez eta denboran zehar irauteko tajuz eginik agertu ohi zaizkigu, hitzen kalitateak iraunkortasun horretan zerikusi handia duelarik.

Atxaga, Sarrionandia, Jimu, Enzesberger eta abarren testuei Ordorikarenak berarenak gehitzen zaizkie (azken disketan musikoarenek leku gehiago hartzen dute); kantu ezberdinen pilaketa baino, asmo edo ideia konkretu baten inguruan bildutako testuak direla dirudi; eta alde musikalean gertatzen den bezala, mendea eta segundua gurutzatzen diren lekura jotzen dute testuek ere. Inork inoiz inon esan bezala, euskal poesia izan daiteke euskal arazoa izenez ezagutzen dena azaltzeko egin den saiorik sakonena. Eta "Ene herrian" bezalako hitzak arretaz entzunez gero, garbi azaltzen zaigu batzutan poema batek SIADECOk egindako ikerketa soziologiko batek baino emaitza argigarriagorik izan dezakeela.