Zalantzarik gabe, Oskorri

Betidanik, Euskal Herrian folk asko egon ohi da, eta inguru honetan talderik erakusgarriena, nola ez, Oskorri da. Lan hau hamabostgarrena da eta Kepa Junkera, Luis Delgado, Xoxe Manuel Budiño eta Flaco Jimenez bezalako aparteko musikoen laguntza jaso du.

Disko hau osatzen duten hamazazpi kantek talde honen betiko tankera aurkezten dute. Oskorri ez da inoiz izan bere musika estiloan aldaketa handirik egin duen taldea.

Landalan-en abestien moldaketa lana oso nabaria da, "Alabaren ezkontza", "Agirretarren bandera" eta "Idahoko berriak" abestietan batipat. Aurreko Katuen testamentua-n aritutako bi partaide berriengatik (Josu Salbide eta Juantxe Aguiar) izan daiteke. Hitzei dagokienean, ohizko diren Jon Sarasua, Koldo Izagirre, Patziku Perurena... idazleez baliatu dira.

Flaco Jimenezen akordeoiak eta Luis Delgadoren perkusioek diskoari kutsu berri eta bitxia, aldi berean, ematen diote. Oskorriren musikoek teknika hobezina daukatela esatea ez da ezer berria, baina Landalan-en Bixente Martinez eta Anton Latxaren kitarrak eta Josu Salbideren flautak, gaitak eta abar (honez gain zenbait kanta berak konposatu ditu) nabarmendu behar dira.

Oskorrikoak profesional izugarriak direla erakutsi digute, musika munduan murgilduta dauden hogeita bi urteetan beti punta-puntan egon baitira.