Dut taldekoek argi daukate zer egin nahi duten, eta hori erakusten du bere lan berriak. Argi eta garbi. Oso disko ona osatu dute. Iluna, gogorra, bortitza, nahiz eta kantu batzuek une lasaiagorik ekarri. Erritmo biziak dira, erotuak, hainbatetan; azkarrak eta mantsoagoak, eta haien gainean eraiki dute beren doinua, Dut-en doinua.

Diskoko kantuak sortzeko garaian nabari da kantuaren barrura sartu direla, kantuaren mamiari begiratu diotela, kantu bakoitza osatzeko. Beren kezkak, sentimenduak eta emozioak agertzeaz gain, etorkinen afera, Abiadura Handiko Trena eta gizarteko beste hainbat gairen eta kaken inguruan ere mintzo dira. Amaitzeko, aurkezpena ere gustatu zait.