Mugalari berri birekin agertu zitzaigun Ruper joan den larunbatean Getxoko antzokian: Angel Celada bateria jolea eta Jose Gereñu baxujolea. Berriak bai, ezezagunak ez ordea. Biak ere kategoria handiko musikariak, eta oso estimatuak baitira hemen zein kanpoan. Lehenengo Mugalarietatik Nando de la Casa (teklatu eta perkusio elektronikoa) eta Ruper bera gelditu dira oraingo formazio eraberrituan. Lujozko taldea, beraz. Lujozkoa eta aldi berean soilagoa, orain bigarren kitarrarik gabe jotzen baitute. Kitarra bakarra Ruperrena da, elektrikoa nahiz akustikoa, kantuaren arabera.