Bi hamarkadako atzerapenarekin iritsi da lanik biribilena. Bistakoa da familiek eragindako atsedenaldia ederki probestu dutela. Baina ez dira ez bereizgarri eta ez arrakastatsuak. Ordea, oso fidelak diren zale apurrek estimatzen dute Leihotikan taldea. Sei urteko etena hausteko Harold izeneko abesti bilduma eskuzabala osatu dute Iruñekoek. Bizkorra oso, eta melodikoa. Ez dira 90eko hamarkada hasierako gazteak, baina taldearen izaera sobera mantendu dute, eta hein batean, baita indartu ere. Bad Religion beteranoen bidetik, tarteka oso hurbiletik, euskarazko hardcore nahiz punk rock melodikoa da nafarren oinarria. Originaltasunaren parametroetatik ihes eginda, laukote xelebrea fresko eta sasoiko dago.